早幾日2047香港監察召集人錢志健喺《蘋果》寫文，講述政改袋住先，香港只會被掠奪得更徹底嘅觀點。點知咁都俾近排四圍辣火頭嘅新聞統籌專員馮煒光睇中，又喺番《蘋果》嘅網上論壇寫文反駁。不過今次白宮發言人撩交嗌，就似乎冇乜效果，因為錢志健同八方講，佢冇興趣理嗰個馮煒光，更加冇興趣同馮專員打筆戰囉！
話說錢志健篇文主要係透過一位共產黨員嘅經歷，帶出大家一定企出嚟發聲呢個訊息。不過馮專員獨具慧眼，話可以從錢嘅文章中，睇出錢聽唔明北京腔普通話、英文文法唔啱呢啲問題，繼而引伸出錢志健需要兼聽、需要加強溝通及語文能力嘅結論。
網友話小學雞
馮專員搵人嘅文章挑機唔係第一次，但事後都俾人追擊番轉頭，早排仲因為咁，俾一班現役及前記者喺facebook圍攻，最後潛水收場，今次佢又挑機，八方都要問問錢志健回應，睇睇還唔還擊，但錢嘅回應就好抵死，佢先引述網友回應馮專員嘅言論，「唔單止小學雞、直頭冇腦」，因為呢位網友指出，馮專員認為文章中英文文法有問題嗰句嘢，實情係錢志健引述共產黨員所講嘅，咁都可以賴落錢志健度，只係反映馮專員連基本理解能力都冇，簡單咁講，即係馮專員自己搞錯嘢鬧錯人！
至於錢志健自己嘅回應，就只有一句：「𠵱家妖孽當道。」仲話唔想見到香港人要講「我要假普選」先可以生存。八方亦都好盡責，再問埋馮專員回應，佢就重施絕技，以錢志健根本冇回應到佢嘅論點作為回應囉。
李八方
MAILTO:[email protected]