歐洲球季接近尾聲，但好多聯賽嘅升降班隊伍都仲未落實，要估波除咗睇實力，亦要睇埋球隊關係同心態。所以季尾波啲戰果往往令人意外，就算講鬥志，事實上都難以捉摸；過往咁多年經驗都係以亞洲日本波比較正路，但亦唔可以掉以輕心。
早幾日收到一個當年喺亞洲足協開會認識嘅日本朋友傳來問候電郵，往來之間我當然問吓料；佢話早知香港同中國對估波呢個遊戲玩得好勁，但日本球員對自己係足球員呢個身份十分尊重，所以操練同比賽都十分投入，一場波嘅勝負往往影響心情幾日喎。
聽來聽去都好似講唔到重心咁，我惟有直接問佢隊橫濱水手今個星期作客山形山神點睇，佢話三個字：「冇得輸！」其實山形山神近況甚曳，周中和到波都只係算「符碌」；橫濱水手有回勇之勢，除咗有主力中村俊輔復出，歐洲級水平嘅巴西前鋒艾迪美臣巴拉加都話開始捉摸到日本比賽嘅方式，漸入佳境，連土炮前鋒伊藤翔最近都有斬穫，所以客W有1.77倍其實都啱路。
至於意甲方面，就有場森多利亞對祖雲達斯，可用祖記讓平/半嘅1.93倍上盤做變倍器。森多利亞近五場三和兩負，祖記下周中就要喺歐聯對皇馬，必定要以贏波壯行色。祖記雖然喺「都靈打吡」失手，但已迅速反彈，泰維斯近五仗聯賽入四球，狀態一定冇問題，讓平/半博得過，臨近季尾都真係希望順返啲，搵多少外遊旅費，哈哈！
本地職業領隊
耳聽八方 專收好料