佔領運動嘅「拆大台」之風發展至近月的退聯潮，繼港大、嶺大、浸大、理大後，城大亦正進行退聯公投。花生友聽聞，今次城大退聯勢頭勁，學聯告急，更甚者，退聯派打算公投後再發起罷免城大學生會幹事會，𠵱家擬收集學生聯署。除咗嶺大外，之前嘅退聯公投都成功，今次城大一旦退聯，學聯嘅規模將減半，除咗在學界代表性被質疑外，更實際問題係唔夠錢使。
民陣呻窮要追數
花生友聽聞，如果連城大都退出埋學聯，會費收入將會大減六至七成，粗略計大約只得十幾萬元，連行政幹事嘅人工都唔知夠唔夠畀，知情人士話未來一段時間要「食住穀種」，再圖後計。雖說學聯啲「穀種」有番咁上下，但花生友聽聞入面好多係唔可以立亂郁，即係睇得唔用得。
講開唔夠錢使，民陣其實都好鬼窮，聽講𠵱家得廿幾萬，怕且要「追數」先得，因為按慣例，參與7.1嘅團體喺當日籌得款項，十分一要上繳民陣，不過有籌款能力強勁嘅團體已講到明唔會科水喎，事實上過去一直有民陣團體唔肯科水，甚至追都唔肯畀先例，所以民陣「追數」係完全唔樂觀。
花生友