英超去到季尾，前有前爭、後有後鬥，車路士冠軍差唔多已經落袋，曼城、阿仙奴（圖）同曼聯歐聯入場券似乎都冇咩問題，反而護級上面，睇嚟要鬥到最後一日，先會知道邊幾隊冇得留低。
侯城上場主場擊敗利物浦，的確有啲令人意想不到。話晒雙方歷史對過19次，利物浦贏13次，有明顯優勢。但係護級球隊好多時候就係有呢啲決心，「遇神殺神、遇佛殺佛」，近幾年去到季尾成日都出現。預期最後幾輪比賽，都會出現唔少以弱勝強嘅比賽，如果大家一心覺得強弱分明嘅比賽會好正路，咁就真係大錯特錯！
睇番𠵱家榜尾，般尼、昆士柏流浪似乎都幾難有得留低，相反李斯特城、維拉踢踢吓又好似有啲機會。而侯城上場贏波後，壓力又鬆咗啲啲。不過各支球隊相信都明白早贏有着數呢個道理，所以似早啲攞夠分先係應該做嘅事。
之不過，侯城今星期對住嗰隊係阿仙奴。阿仙奴上場對車路士和氣收場各得一分，雲格睇嚟已經打定輸數，知道冠軍真係冇咩希望，不過球隊都想確保前三位置直接打歐聯，戰意唔使懷疑。而侯城要護級，當然都唔會坐以待斃，會以一分為目標。所以呢場賽事應該唔會有太大比數，阿仙奴贏侯城2:0就啱啱好。
LULU
不懂踢波愛睇波