仲差三分，車路士就會成為英超冠軍！佢哋星期三晚作客李斯特城，反勝3:1，只要嚟緊星期日贏埋水晶宮，就會提早三輪封王。一切順利嘅話，喺今月10號主場對利物浦場比賽，車路士仲可以冠軍身份，接受對方球員夾道歡迎咁出場，再剃多次紅軍眼眉。
周三對李城場波，車路士唔係贏得輕鬆㗎，半場落後0:1。領隊摩連奴喺半場休息激勵完班球員後，隊波換邊後唔同晒，先靠杜奧巴追平，再有泰利同拉美利斯各入一球，最後反勝3:1，攞晒三分。𠵱家車路士以80分排榜首，喺數字上正式K.O.曼城同曼聯，得番阿仙奴有機後上。但只要車路士喺嚟緊星期日主場對水晶宮攞多三分，阿仙奴都要投降，由藍戰士贏得球會史上第四座英超錦標。
摩佬：要保持專注
雖然摩佬賽後笑晒口，但佢一而再提醒球迷同球員，絕對唔可以用贏硬冠軍嘅心態迎接對水晶宮場波，「我哋仲未掂到個盃㗎，多三分先得。下場我哋喺史丹福橋嗰陣，唔係去慶祝，希望球迷星期日入場係同我哋一齊戰鬥。球員𠵱家喺更衣室入面好開心，但佢哋唔係因為贏冠軍所以開心，而係贏咗一場波，離冠軍近咗一步。我哋要喺下周日保持專注同鬥志。」
摩佬補充，車仔嘅前鋒荒已解決，迪亞高哥斯達有機會對水晶宮復出，「佢同雷米周二已經同大隊一齊操，雖然周三我哋嚟咗比賽，但佢哋兩個仍然努力復操。𠵱家我有本錢保護佢兩個，所以會耐心保護佢哋。」至於喺英超歷來射入38球、今場平咗安斯禾夫個英超後衞入波紀錄嘅泰利話，車路士唔係球迷口中嘅悶波，「我哋係全季表現最好嘅球隊，希望下星期日封王。」
紅軍拍掌歡迎好慘情
下周日對完水晶宮後，車路士會喺10號主場對利物浦，如果藍戰士提早封王，呢場紅藍大戰將會成為例行公事，而紅軍球員將會按傳統，喺賽前列隊拍掌歡迎車路士出場。上年利物浦就因為季尾對車路士有隊長謝拉特跣腳而輸波，將聯賽錦標拱手送咗畀曼城，若果今季反而要拍手恭喜車路士，相信利物浦領隊羅渣士都應該眼淚在心裏流。
識睇，一定係睇足英台【英波Live】：
http://soccer.appledaily.com
http://bit.ly/engballlive