被視為建制派壞孩子嘅自由黨「精神領袖」田北俊作風越來越大膽，除咗狠批死敵梁振英外，田少嘅「棒打版圖」已經逐漸擴闊，上至全國政協副主席董建華、下至建制派議員、官員，甚至大爆中聯辦嘅政改部署，總之話知你係邊個，敢言嘅田少統統無面畀。
好似建制派搞緊「人人過關」嘅表態撐政改大行動，田少一樣冇面畀，佢噚日出席電台節目，大爆中聯辦請佢哋自由黨同啲官員落區一齊宣傳「一定要得」，但佢未答應，話要諗諗先，不過自由黨主席鍾國斌其後澄清，中聯辦係請自由黨參加反佔中大聯盟周融嘅支持政改大型宣傳行動，即係話田少變相連周融幕後「黑手」係西環都踢爆埋，不過田少咁大支嘢，又點會怕西環、點肯做薑蓉佈景板先？
指董建華影響施政
至於同佢因為23條而有過牙齒印嘅董建華，田少更加冇面畀，話董建華作為前特首多次出來論政，會令現屆政府好難施政：「如果將來個個前特首都出來畀意見，咁邊個管治緊香港？咁會令現屆政府好難施政。」田少之前係政協，可能仲要畀身為政協副主席嘅老董兩分面子，𠵱家柴都搣咗，仲使畀面咩！
李八方
mailto:[email protected]