曾是陳志雲頭號愛將的崔建邦，5年前在志雲捲入涉貪事件被無綫停職後，一度為保飯碗而離棄志雲，其後崔建邦因之前涉打前女友鄺敏慧及醉駕形象插水，志雲強勢回歸無綫後亦不計前嫌助他翻身，可惜志雲2011年12月離職無綫後，崔建邦隨即變臉，跟志雲劃清界線，翌年志雲加盟商台任行政總裁，多次邀請崔建邦出席商台活動，崔建邦也一一拒絕，徹底傷透志雲的心，兩師徒關係亦隨之宣告決裂；去年5月志雲與崔建邦出席無綫資深化妝師張家萬（Gary）的喪禮時，二人更是擦身而過，儼如陌路人。
「已經冇任何嫌隙」
不過，絕交三年的志雲與崔建邦，關係近日有戲劇性發展，兩師徒原來今年1月2日曾在銅鑼灣的心燒食堂飯局冰釋前嫌。日前志雲在商台接受訪問，問到他有否後悔幫過崔建邦時，志雲說：「冇，第一我唔覺得幫咗佢，第二，儘管我幫咗佢，又即使佢真係對我好差，我都唔會有後悔呢個字，因為我唔可以比較，同埋我𠵱家同佢已經冇任何嫌隙，我都同佢食過飯傾過偈。其實喺Gary過身之後，有一次喺靈堂影到我哋擦身而過，我唔知佢點諗，但我覺得嗰個場合唔係好適合大家有個招呼，當然之前我都冇乜點見過佢，冇乜溝通過，但後來佢同我聯絡，佢好想同我食飯傾偈，我哋都有見番面，食過一兩次飯，所以根本冇乜嘢嫌隙。」
邦邦為反骨解畫
跟崔建邦飯局時，對方有否解釋之前被指反骨的事及雙方之間誤會？志雲說：「有講番，但我冇同佢深究。其實都係閒話家常，講吓呢幾年有啲乜嘢、工作狀況點，都冇乜嘢特別。佢話好開心同我食飯傾偈喎。」是否已經原諒對方？志雲笑謂：「原乜嘢諒吖，我遇到一個人係一個緣份，唔需要帶住啲乜嘢悔恨、嬲怒、憎恨，真係好無謂㗎嘛。」
採訪：魯吉