公司有個天井花園，種滿花草樹木，不時有同事坐喺度講電話、傾偈，貪嗰度靜靜哋（講乜要咁靜？你懂的）。噚日喺花園聞到一陣香味，見到棵鐵樹，掛咗一個紅色利是封，仔細一睇原來係鐵樹開花。點解鐵樹開花要掛利是？唔吉利嘅咩？
「中國人有個習慣，逢係遇到少見嘅嘢，就會擔心唔吉利」，玄學家麥玲玲話，鐵樹、竹都係較少開花嘅植物，如果見到開花，傳統就會簪花掛紅，即係放封利是旺吓佢。不過，佢話鐵樹開花只係象徵轉變，唔一定係唔好㗎，「反而有幾個客仲添丁、中六合彩㖭」。
#趁天氣好開花
香港蘭藝會會長朱劍虹都認為鐵樹開花係適應轉變，「變嘅係天氣」。佢解釋，植物對天氣好敏感，而且會居安思危，例如感受到天氣會越來越乾旱，會趁好天氣努力生長，甚至連平時唔開花嘅都會開花。
朱劍虹話近月雨量少，而台灣都試過制水，所以公司棵鐵樹可能因為咁先開花。
如果真係要迷信，費清寧願信「鐵樹開花，富貴榮華」。網絡時代，世事變化一日千里，好多嘢都預測唔到，連天氣都係；雖然有時天氣不似預期，但鐵樹都應變執生開花，共勉之。
費清 ＃要生計，也要生活 ＃毋忘初衷