【前晚尖沙嘴】杜汶澤和導演邱禮濤這對最佳拍檔，最近籌備的三級江湖片《選老坐》，前晚11時多在尖沙嘴棉登徑拍外景，現場見到杜汶澤、姜皓文（黑仔）和吳浩康（Deep）拿着道具刀，他們帶隊晒馬劈友，雖然夜麻麻，但仍吸引近百南亞裔人士圍觀睇熱鬧，大家都高舉手機拍攝。
劇情交代阿澤與黑仔是同一幫，他們與Deep街頭講數不果，先動口再動手，黑仔勞氣爆粗：「使唔使咁X樣？」Deep被辣㷫還擊：「點X樣？」阿澤向Deep狠狠劈過去，劇組安排了約40名臨時演員扮社團之友街頭混戰。
阿澤昨日凌晨在facebook貼上Deep造型相，還抵死留言：「楊先生（楊受成）話你（吳浩康）如果開黑社會戲唔搵呢個人係你自己損失。我信。」這句不知是褒是貶？但Deep卻回覆：「不敢當！盡力而為！」
王宗堯吹水偷師
拍攝現場還發現男神王宗堯的蹤影，他拿着手機拼鏡頭不停喪影，據知王宗堯在戲中扮演重要角色，佔戲很重。故事交代阿澤踎監出冊後，決心再戰江湖，可是時移世易，王宗堯已在江湖上站穩，更是chok爆的社團男神。
王宗堯前晚雖沒戲份，但都來探班取經，他趁空檔與導演邱禮濤邊煲煙邊密斟，王宗堯昨日在電話中說：「我未拍過呢啲劈友場面，我好欣賞邱禮濤拍呢類戲好勁，可以捉到一啲神韻好到位、好寫實，戲中我都幾好打，遲啲都有劈友戲，噚晚先去偷師，我同阿澤好多爭上位戲。」
採訪：陳杰、黃曉程
攝影：徐錦池
