呢兩日城中熱話梗係2,800萬綁架案，霍氏公子霍啟山噚日去屯門遊艇展覽，膽粗粗單人匹馬上陣，連保鑣都慳番。佢同八方講，綁架真係未驚過，屋企人都冇特別防備。
霍啟山話喺公司有睇到綁架單新聞，但係冇特別加強保安，唔會因為咁而請保鑣，「不嬲都好低調好自然，亦冇留意呢方面（保安）」。佢雖然有做開運動，但係又覺得未使鑽研功夫自衞，「我唔識功夫，呢啲要練，港產功夫片就好鍾意睇。我踢波腳法OK㗎，有機會睇吓我踢波」。
近日老竇霍震霆公開讚啟山營商有道，佢噚日笑笑口話冇聽過。下星期就母親節，佢送畀靚媽朱玲玲嘅禮物，就係陪佢出席慧妍雅集派對。