【本報訊】勞工的事，也是「姐姐仔」的事，性工作者藉勞動節申訴她們的悲歌。智能電話盛行，有經營「一樓一」的鳳姐指，近年越來越多嫖客在接受服務時以手機偷拍，亦有人專門在「睇鐘（門外按鐘）」時拍下鳳姐開門一刻，然後「運吉」離開，事後不單上載討論區作「賽後報告」，甚至在短片網站公開。有關注性工作者權益的組織製作指引，着「姐姐仔」提防。有律師解釋，本港沒有針對偷拍的法例，要杜絕上述情況，可由擴闊私隱條例保障方面着手。
Yoyo入行8年，形容近年客人的偷拍伎倆層出不窮，「啲人入到嚟，會咁樣擺部電話喺隔籬，鏡頭向住你，以前唔敢鬧，拎開部機等佢影唔到我就算，最多做嗰陣唔出聲，𠵱家會用毛巾遮住部機，或者直接鬧佢」。她指最近志在偷拍的「垃圾客」越來越多，「有啲衰到睇鐘嗰陣用部機咁樣影住你，我會喝佢『拎你部電話嚟！』」
私隱條例多限制
Yoyo警覺性高，因為曾經中招，被人把相片放上討論區品評，「唔開心囉，鏟又鏟唔到，又冇佢電話」。關注性工作者權益組織青鳥行政總監嚴潔心指，一旦被偷拍，鳳姐難以追究，有姐姐仔曾聘請律師，最終迫令網站刪除影片，「但冇乜用㗎，鏟咗佢仲係有，根本你一擺上去啲人就可以自己save低」。
青鳥曾就此發出指引，提醒姐姐仔注意客人的呔夾、筆、鞋頭、手錶、皮帶扣和眼鏡，留意有沒有反光點，「佢入嚟畀個膠箱佢放私人物品，自己盡量開工樣同平時唔同，化妝、戴眼鏡、戴假髮，就算俾人影到，親人都冇咁容易認得出」。
律師梁永鏗指，本港現時沒有針對偷拍行為的法例，很多時只能引用私隱條例，「但香港嘅私隱條例只係保護個人資料，好多限制，如果你影到個人，又未必係針對佢身份，就比較難引用」。
梁解釋，視乎偷拍者的做法，上述情況可能使用淫褻及不雅物品管制條例，使用手機拍攝可能涉及「犯罪及不誠實取用電腦」罪，「好似以前有啲案咁，就咁擺部機放喺宿舍偷影好難告，如果佢唔放上網好難告得入」。他指訂立針對偷拍的法例爭議大，需由立法會討論是否有此空間，認為公眾可以考慮參考外國的私隱條例，「佢哋全面啲，有機會用私隱條例擴闊啲，唔係淨係包個人資料」。
■記者張嘉雯