小弟同牽牛兄講起英超護級形勢，都真係好混亂，冇話邊隊降硬。講講吓，不如諗吓大家最唔想邊隊留喺英超啦，小弟就認為昆士柏流浪（QPR）最抵降班。
QPR係今季英超最高薪低能嘅球隊，人工支出6,800萬鎊（約7.8億港元），係英超第七高薪嘅球隊，僅次曼聯、曼城、車路士、阿仙奴、利物浦同熱刺，但呢堆球隊喺上游爭緊歐聯同歐霸盃資格，QPR呢？就喺度護緊級。球會高層用錢用得咁差，又冇眼光，應該要接受吓教訓，返落去英冠反省吓。
最經典嘅水貨就係里奧費迪南，有啲報道話QPR畀50,000鎊周薪佢，甚至有啲講過係80,000鎊咁多，總之對於小球會嚟講，呢兩個價係應該畀啲帶得起隊波嘅領軍人物。不過，里奧真係老喇，季初頭幾場已經唔對路，之後冇埋正選，但里奧就繼續出糧。
除咗里奧外，QPR上年夏天用咗成600萬鎊轉會費，喺卡迪夫城簽咗佐頓梅治返嚟，點知就買番嚟擺嘅。半年後、即係冬季轉會窗，QPR就將佐頓梅治蝕放去水晶宮，收番400萬鎊多啲。
睇番近幾年，QPR呢隊波幾鍾意喺啲強隊收過氣兵，但多數都貨不對辦，例如幾季前買咗胡禮菲臘斯，但又係越踢越差，仲有保辛華、法比奧達施華同埋格尼路咁，人工都唔平，但真係形同虛設，基本上都係失敗之作。
文：咖喱