香港英超球迷主要都係嚟自Big 4，其餘比較多擁躉已經算係紐卡素；當年舒利亞同真路拿嘅年代，娛樂性踢法吸引到唔少粉絲，好似當年對利物浦常開4:3波膽，連港產片《求戀期》都要偷橋。
但同亞視一樣，淨係識緬懷過去，就唔會有進步；紐卡素同韋斯咸基本上上半季拎夠分後，早喺今年一、二月已經開始放暑假，特別係紐卡素，佢哋嘅鬥心真係好有問題，咁又好難怪，肥佬班主同球迷關係又差，球員亦都知道自己唔會長留，有好表現嘅，好似丹巴巴亞同迪保治等都被放走，遠離東北就好似甩難咁。嚟緊仲有門將告魯爾、前鋒艾約斯佩雷斯等走，水貨好似雷米卡比拿、利維亞尼又一大堆，真係唔知點搞。
不過暑假太早放，搞搞吓𠵱家紐卡素隨時落水；原本上個月講紐卡素會降班，仲會有人笑，不過睇住侯城、李斯特城係咁贏，紐卡素就繼續唔爭氣，對風流波史雲斯都輸得，三月至今七場聯賽輸晒，對上一次贏波係擊敗阿士東維拉，如果維拉早啲由舒活揸旗，戰果隨時可能改寫。紐卡素都好彩，仲有更加唔爭氣嘅新特蘭，睇個勢兩支東北球隊應該有一支降班，小弟黑心啲，紐卡素唔降班，肥佬班主都唔會知錯，好彩另一邊廂米堡都有英超升班附加賽資格，如果米堡真係升到班，英超仲keep到有東北打吡，都叫做有啲話題性。
文：牽牛