喺其他地方，政府宣佈消費物價及失業率數字，係財經界重要日子，但香港人大概已經慣咗低失業率，好消息不是新聞，一年來本港報紙對失業率與通脹率全不重視，將新聞擺咗唔知去邊，甚至唔報，報紙只鍾意講八卦，講飲講食，對嚴肅新聞置諸腦後，唔怪得報紙銷路日跌，公信力日差，啲老闆及總編輯自己做死張報紙。話潮流變，人人睇手機，唔睇印刷報紙喎，當然係實情，但地鐵上嘅低頭一族，睇手機做乜？以左丁山觀察，主要有三款：一款玩WhatsApp上facebook，一款玩遊戲，一款就係上網睇網站/報紙手機版，其他唔講嘞，睇報紙/網站嗰類其實係睇緊報紙內容（content），如果報紙冇內容，好難吸引到低頭一族嘅讀者咯，如講內容，唔通一味睇這個大胸女郎爭做二奶小三，向大婆示威？如果係嘅話，出版報紙做乜喎，淨係專營八卦網站內容咪得囉。
最新嘅通脹率係4.5%，失業率係3.3%，香港人慣咗如此數字，已無反應，但五月一日開始增加最低工資，由時薪30元加到32.5元，最開心者就係做保安看更嘅人士，最頭痕嘅就係飲食業，因為有咗最低工資之後，適逢香港全民就業，失業率低至3.3%，導致不少飲食業低層工人流失，流向做保安員一類，食肆唔係唔加人工，但港島食肆請洗碗工人，出到60元時薪，仍然請唔到人，記者G話在港島街坊茶樓飲茶，已慣咗「半自助形式」，好難搵到伙記加水斟茶嘅嘞。餐飲M就希望一簽多行改為一周一行之後，零售業不景，吉舖漸多，租舖可以減租，零售店炒吓人，等食肆請人比較容易啲，不過佢自己都承認係空想啫，因為零售與食肆係不同行業，好難幻想被炒嘅女售貨員肯加入餐廳做侍應！珠寶零售店經理M加入話題，話好彩老闆之前已經搵長咗，有實力守落去，否則目前佢間大寶號生意比去年下跌咗五成有多，淡到佢返工都冇心機。餐飲M笑曰：「唔怪得我上星期走入大道中一間珠寶店買生日禮物，幾位老友夾咗八千蚊，由我發辦，一行入店內，就有五位男女職員將我包圍，搞到我好唔好意思！」此時公子L啱啱嚟到，佢話「哈，我地做鑽石珍珠轉口批發，日本office日日來電郵催促我地加碼交貨，日本珠寶店賣到冇貨賣，強國人遊客趁日圓下跌，逼爆東瀛，買鑽石、買珍珠，買到唔停手呀，香港珠寶店不如將啲珠寶首飾運去日本出貨啦！」