電影《赤道》慈善首映禮前晚喺九展Emax舉行，張家輝、張學友、張震、余文樂、韓星池珍熙和崔始源等演員現身撐場，嘉賓就有梁愛詩、林建岳同埋舒淇。學友同家輝被指「兄弟對決」？學友話：「都有啲啦，今次第一次正式同張家輝合作。」學友話今次係以年齡去計辛苦程度：「呢部戲打嘅戲份按年紀排，王老師（王學圻）就第一，唔使打，跟住就到我唔使打，一路排落去，個個打到儍咗。」
講起池珍熙拍到暈嗰件事，家輝話：「唔知係咪韓國演員要好嚴格keep住身形，佢拍完一個通宵班，第二日講講吓對白，就暈倒喺我面前，我好驚，佢跌落地撞落我隻鞋度。」學友就補充話：「如果佢撞落地下，爆硬，之後佢好快醒咗，入院檢查。」
「撞落地爆硬」
當事人池珍熙就講番當日暈低經過，佢話：「係呀，好彩家輝扶一扶我，托一托我頭，亦都因為佢扶我，先冇受傷。」佢解釋話：「其實因為韓國好多工作，所以有啲攰。拍港產片好輕鬆，韓國拍劇更加辛苦。」
撰文：馮仁昭