香港武術界一直卧虎藏龍，不過各門各派只靠師傅口耳相傳，唔少師傅逐漸老去，有啲更加冇收徒弟，一身好武功面臨失傳危機。船王趙從衍個孫、中華國術總會創辦人趙式慶，自細對武術相當着迷，醞釀6年籌備3D武術資料庫，透過立體動作擷取技術，記錄每套武功嘅動作同勁度等，至今已經收集咗詠春、林家洪拳等19個門派嘅武功。佢仲親自同各派師傅訪談，以文字記錄武功要訣同門派歷史。佢話上一代師傅的確唔太願意向外人分享武功，但時移世易，唔少擁有真材實學嘅師傅都理解傳承文化嘅重要性，亦自覺有份責任，大家一拍即合。資料庫獲得城大技術支援，最近透過FringeBacker集資網站同劉家良導演慈善基金資助，總共籌得26萬元。不過資料庫目前未對公眾開放，趙式慶話要同各派師傅傾傾先。