長和（001）與和黃（013）噚晚上載咗最新嘅年報，如無意外，應該係和黃最後一本年報。其實每年和黃年報，大家都係最關心「打工皇帝」霍建寧搵幾多，計晒所有薪金、花紅同津貼，霍大班舊年一共袋咗1.96億元，加幅4.3%，好似好少？留意番喇，如果唔計啲一次性、非經常收益，和黃舊年實際盈利增長只得3%左右，霍大班依然係成個長和系中，人工最高嗰位，怪唔知見親佢都笑騎騎咁啦。
咁超人李嘉誠嘅接班人李澤鉅（Victor）又如何？按年報，作為長和副主席兼董事總經理嘅Victor，舊年計埋佢喺長和、和黃同長建（1038）嘅收入，都係得1.44億元左右，少霍大班半個億。
除咗霍大班，市場當然最八卦樓神趙國雄袋走幾多年薪。按年報，趙國雄舊年總年薪3,012萬元，輕微加薪5.3%。基本上，不計長和主席李嘉誠每年袋1萬蚊，同埋太子爺李澤鉅，長和6位執行董事，佢哋舊年平均加薪5至6%。