政治人物嘅江湖地位，唔係一朝一夕可以煉成，大家睇吓民主黨主席劉慧卿就知，事關政務司司長林鄭月娥好畀面卿姐，今日接受卿姐主持嘅網台《議會內外》訪問，呢次仲係林鄭上任司長3年以來嘅首次。唔少政府中人覺得卿姐夠堅之餘，亦覺林鄭此行有撬票目的。
卿姐主持《議會內外》都有好幾年時間，花生友都去過採訪；無論泛民同建制派重量級人物、政府官員，好多都曾經係卿姐座上客。對於林鄭應邀，卿姐一啲都唔覺得飄飄然，佢同花生友講，實情佢都係上星期先約林鄭，對方都應承話得，明顯林鄭都想搵機會講嘢，佢覺得多啲溝通亦係好事。卿姐仲提醒花生友，今日記得早啲擔定凳仔到場霸番個靚位。
目標撬民主黨6票
但無論卿姐幾有江湖地位都好，始終𠵱家係政改關鍵時期，而民主黨幾度重申反對8.31下政改方案，林鄭咁情況下都肯捧場，又難怪政界中人懷疑林鄭出動誠意誠意牌打動卿姐，尤其政府一早講明，民主黨6票係撬票重點。
話說回來，花生友都聽過不下一位官員覺得，實情卿姐個人都幾公道。諗番起上屆立法會嗰陣，卿姐連續4年做財委會主席，其間經歷高鐵撥款爭議、臨尾仲有個政府架構重組撥款，就算係對住自己友，卿姐一樣公正處理，將會議處理得井井有條，而且裏外都係嗰句，相信因此獲政府官員歡心。
花生友