港股進入大時代，港交所（388）股價一個月唔夠，就由復活節長假前196元，升到去300元關口，行政總裁李小加因管理層股份獎勵計劃，而獲發57.6萬股港交所，以噚日收市價293.6元計算，市值1.69億元。
大家當然好關心佢幾時沽貨套現喇，噚日佢喺股東會之後就笑笑口話「家裏的董事長是花錢的」，𠵱家「有足夠錢可以花」，唔使賣住喎。
小加暫時唔沽貨係明智嘅，事關滬港通到近月先開始開行turbo，年內又憧憬深港通啟動，港交所做獨市生意，肯定財源滾滾來，股價應該仲有上升空間，冇理由𠵱家止賺。
噚日出席周年大會嘅小股東相信好滿意港交所今年表現，出席人數創5年新高，而呢213位出席嘅小股東又極之易話為，總共10項決議案全部以99%贊成票通過，會上又冇提問，難怪主席周松崗會後笑晒咁話，今年股東會「好順暢」！