潘頓為咗造輕磅，連水都唔敢飲多一滴，搞到近年接連入院做手術清除腎石，冠軍騎師有苦自己知！剛禮拜日缺陣冇份跑，失咗「超有利」一win，今晚佢喺谷草復出，頭場輸完「仁愛之友」，第二場四班千二米即刻醒神番，幫最佳戰友方嘉柏騎2.5倍大熱門「星運俊爵」一放到底，自己贏番場補數之餘，方嘉柏更火速起孖，頭兩場出兩駒「威百利」、「星運俊爵」贏晒，包辦第一口孖寶。賽後「星運俊爵」的賽車手馬主美魔男游紹賢，拖住其索腿嬌妻拉頭馬，大讚方嘉柏訓練工夫及部署均無懈可擊。
「星運」系馬大大話話靜咗超過半年，季初9月21日「星運俊爵」建功，事隔七個月此駒再入凱旋門，都算苦盡甘來；今場跑第二係孫廐「麟轉乾坤」，孫達志頭兩場出擊，「原始寶石」、「麟轉乾坤」做晒二奶，都係衰喺方嘉柏手上，孫達志季內維持七win冇變，繼續做練馬師榜沉底鱷，護級形勢一啲都唔樂觀。三、四名分別係冷門「銀飛龍」同次熱門「飲食之星」。
方嘉柏指「星運俊爵」今場贏馬關鍵是對手弱，因此賽前他對馬主游紹賢表示有一定赢面，而此駒今仗除去眼罩有新鮮感，也對爭勝有幫助。