咦，《選戰》藍光box set出咗差唔多成個月，家陣先嚟寫碟評？並非龍叔叔偷懶，而係港視PR話套限量box set定單晨早爆晒，唔知幾時先留到一套畀龍叔叔，只得普通版有現貨，問我要唔要。今次套限量版box set喺包裝上實在太有意思喇，黑色硬皮盒，頭頂開個窿，盒面寫到明係投票箱，擺到明講黑箱作業，入面仲有假嘅特首候選人選票，畀你揀老奸巨滑宋漫山或人民希望葉晴。成個創作概念出位到爆，就算上網用炒價bid，龍叔叔都要班一set返屋企供奉。反正一早已經煲晒全套《選戰》，都唔爭在等多幾個禮拜，若然一早拎咗套普通版，相信都幾難逼到PR姐姐補番套box set畀我。有啲嘢，就係唔可以袋住先。
當收到「真box set」後，龍叔叔花咗一個周末，重頭睇多一次，《選戰》無疑係龍叔叔呢兩年最愛嘅電視劇，節奏明快劇力逼人。突然發覺李心潔飾演其中一位特首候選人葉晴，就算廣東話唔流利，都唔會令人誤認係水貨大媽咁反感。劇集仲紅咗個男神王宗堯，旁門左道不停幫葉晴打選戰，玩政治又真係唔可以齋講理念就贏到對手，以邪制邪先係生存之道。至於最大亮點，肯定係睇廖啟智飾演處心積慮誓要做特首嘅宋漫山，不斷陰陰濕濕枱低交易，赤裸裸兼血淋淋咁描述政治嗰種黑暗，要幾dirty有幾dirty，真係恐怖過月圓之夜路姆西出嚟咬人多多聲。廖啟智嘅神級演繹，有本事吸引住你繼續追睇，屈喺CCTVB度簡直係一種浪費，龍叔叔心目中嘅視帝，一定非智叔莫屬。
電影級製作
雖然劇集隨時可以上港視個app翻睇，不過《選戰》上佳嘅聲畫表現，又真係藍光碟先感受得到。最明顯係1080p/24p嘅畫質，將本身用高解像靚機靚鏡拍攝嘅畫面，忠實咁呈現番出嚟，details位比點播嘅720p細緻得多，而且好多具電影感嘅場口，都可以喺藍光碟上還原番嗰種高難度燈光佈局，真係隨手cap出嚟都可以做電腦wallpaper，龍叔叔喺45吋電視度播，真係好似睇咗齣十幾粒鐘嘅電影。至於當初劇集上架時「過黑」嘅問題，嚟到藍光碟都已糾正番。
入完碟，聽到片頭激盪人心嘅opening music，已經令龍叔叔回憶起之前個個禮拜追劇嗰種期待感，由於音效用上DTS-HD MA 5.1收錄，好多高潮位時嘅重低音同爆炸聲等，都將劇力進一步推高，就連群眾示威同點票站等人多嘅場面，亦都大大加強臨場感，唔似點播咁一堆人聲會模糊咗。第二集葉晴同張癸龍喺貨櫃碼頭雨中漫步，背景播住靚聲版《I'll be there》，紅顏知己默默互撐，嗰種意境真係有三四樓咁高。
要彈係聲效雖好，但有點跟口形唔多夾嘅情況，大大影響雅興，不過轉番2.0立體聲聲軌就冇事，實在係美中不足。
不論普通版定限量box set，都係一個膠盒入晒四隻藍光碟，收藏上幾方便。收錄bonus令人有啲失望，「如何鍊成」系列早已喺YouTube上睇過晒，冇新嘢。特別拆出嚟嘅雨中漫步版《I'll be there》，居然唔係full version，聽到一半就完咗，好吊癮啫。
港視第一次出藍光，係差啲經驗，勝在包裝搭夠，龍叔叔已經期望嚟緊嘅《來生不做香港人》同《導火新聞線》藍光套裝喇。
Profile：
幾十歲老宅男，聽歌煲碟打機無一不癡，一生最大成就便是家中收藏幾千隻碟，假日只愛潛伏家中煲碟，親情跟愛情也拋諸碟後。（ http://www.facebook.com/uncle.dragon.movie）
編輯：陳國棟
美術：吳子豪