九位希臘登山者原本在尼泊爾八級地震發生當天，按計劃上山。可是之前發現遭尼籍嚮導挾帶私逃，最後影都冇。九位山客掃興至極，決定提早回國，飛離尼國當日，地震發生，九人避過巨劫。
希臘人不曉得塞翁是誰，但香港人知道。我們被告之，假如唔袋，一世都冇。假如唔俾林大媽呢鋪「得」，就算你是塞翁，以後都唔一定得。由高官至政治說客，齊向市民放煙幕：家下好天氣，如果唔登山，唔知幾時再有機會，想攻頂？要等第二世！所以，上山先，揀個上車盤先，拎住先，食住先，袋住隻鴨先，塞翁墮馬，臨死前，一翁一票好過冇。
上山容易落山難，大地震隨時爆，泛民不但不應拉隊上，還要即刻撤，在雪崩時政府隻「一定duck」僅有的功能是攬住一齊死。當特首冷笑說「有時真係忍唔到笑」，是政治大地震的先兆！雞鴨鵝三禽組一邊遊車河一邊叫人上，冇人吼。由陸路轉攻海路，警告蘇州過後無艇搭，泛民聽後狗急跳船的話，真係笑死南丫海難時專心欣賞國慶煙花的梁振英！