政改大戰如火如荼，保普選反佔中大聯盟召集人周融亦喺呢個時候有新舉動。原來佢自資幾十萬搞名為HKG嘅網媒；佢話個名係佢構思，「外地都係用呢三個字代表香港，亦可代表HK Good同HK Great」，已經搵咗傳媒人林雲生做總編輯。周融話覺得喺呢次嘅政改討論，支持袋住先嘅市民喺網上冇乜發聲空間，所以決定喺網上畀建制派發聲，「最平就係搞網媒，當然規模肯定唔及動新聞咁大」。
平台主打政治新聞評論，亦有博客文章；問到有冇創意改圖，佢話「會有啲新嘅做法」，下月6日開張後大家就知。唔驚同梁粉陣地《港人講地》搶客咩？「網上世界好大㗎，如果《港人講地》有啲好文章，我哋都會轉載」。佢笑稱今次係「以小博大」，「今次嘅value係會吸引幾多讀者，影響力好緊要，建制派一向喺網上嘅力量都好弱」，仲笑稱：「𠵱家啲傳統媒體都喺網上搵新聞。」