香港大學民意研究計劃公佈2014電視節目欣賞指數調查，結果全年欣賞指數第一位，竟然係亞視嘅《滅癌獻愛心報母恩弘大愛祝福大會》！吓！乜亞視嘅節目都有人睇㗎咩？可惜亞視行政總裁葉家寶噚日冇出席頒獎禮，冇得解釋節目憑乜獲市民爆like；八方睇過資料（嗱，唔係睇過節目呀），呢個節目收視得1點，內容包括一眾患癌人士表演精采歌舞，仲有僧人即席祈福。
查實呢個調查係由港大民研計劃去年4月至今年1月，分四個階段透過電話進行訪問，累積受訪人數達8,098名；涉及本地製作嘅電視節目有204個，總平均欣賞指數為66.18分。
鍊贏無綫 即刻添食
經常俾建制派質疑民調偏頗、負責調查嘅港大民研負責人鍾庭耀解釋，亞視呢個節目雖然只喺第二次調查中欣賞指數獲76.31分，其他三次調查都冇分，但仍以最高平均分鍊贏第二位無綫嘅《守護生命的故事》同第三位港台嘅《鏗鏘集》。
八方覺得最識貨嘅都係葉家寶，佢早前已經喺網誌預告，因為呢個節目攞大獎，所以今年再推出《滅癌獻愛心 報母恩 傳聖火 弘大愛》，5月10日晚8點播出，觀眾若想知呢個節目點解跑出，不妨擔定凳仔。
而全年首20位最高欣賞指數節目中，港台佔14個，認真巴閉。廣播處處長鄧忍光出席頒獎禮時被問到點樣面對要接手喺亞視播節目嘅挑戰？佢話喺放假期間收到呢個消息，估唔到港台可能要做香港第二大台非常意外，仲引用誠哥忠告：「風高浪急，量力而為。」
李八方
mailto:[email protected]