怪醫梁家騮（圖）早前根據業界民調，診斷政改方案冇得救後，噚日同八方吹水時講開，近日頻頻落區宣傳政改嘅特區政府官員，包括政改三人組同高永文局長都冇接觸過佢，「即係我好濕碎囉，即係我無關重要囉」，特別指民望高平日好少搵佢，仲用中聯辦主任張曉明嘅金句回應政府「堅離地」宣傳政改一定要得： 「張曉明主任話個天唔會冧落嚟㗎嘛！使乜咁緊張啫？」
早前有傳媒話佢會喺政改投票時缺席，佢反駁實屬亂吹，重申現時政改局勢無變，個方案同之前一樣。問佢投票意向，佢笑言答法比泛民蠱惑：「暫時都係會投票反對政改方案。」
怪醫發表上述言論唔夠半粒鐘後，民望高就同八方講，梁醫生呢票其實好重要，佢身邊嘅政治助理陳凱欣仲搶住話已經約咗梁醫生傾政改，補鑊𠱁番怪醫箍票。