一帶一路已經令高鐵、核電股炒上天，之後可以炒啲乜？內地股民發揮無限想像力，一帶一路唔單止覆蓋歐亞、南太平洋，仲可以衝上太空，簡直宇宙無敵！
有消息指，為配合宏偉的一帶一路計劃，中央正研究發射更多衞星。A股衞星股呢幾日不斷升停，證明只要有諗頭，股價就可以坐火箭上升。
按照專家講，一帶一路所覆蓋的中亞地區，大部份通訊落後，要靠衞星傳輸。目前覆蓋呢個區域的衛星數目少，到將來一帶一路發圍，就一定唔夠用。阿爺點會允許咁冇面情況發生？所以一定要射多啲火箭上太空。
另一個講法係，為咗搞一帶一路，中國總理李克強在海外大力推銷國產高鐵、核電，之後都可能輪到國產衞星，到時股價隨時翻幾番。高鐵核電股已證明，冇嘢係唔可能。
黃尹華