內地擬下調消費品進口關稅，並暗示會調整消費稅政策。有商場主管形容，這消息對香港零售界來說是「屋漏偏逢連夜雨」，好似衰開有條路咁，原本港元持續走強，內地旅客已大幅減少，點知政府接着就宣佈改推「一周一行」，現在又輪到中國政府話要減稅。當持續十年的「大運」一朝耗盡，香港零售就好似港產片中的「麻雀大俠」，由以前所向披靡，現在變成「鋪鋪摸爛牌」，仲係「要邊隻、無邊隻」。
該商場主管說，旗下商場在3月份，有商戶生意按年大跌30%，跌勢不限於珠寶、手錶等奢侈品，一些中檔商品生意都未止跌。雖有主力做本地客零售商銷售仍有增長，但本地客無論點使錢法，都好難好似出外旅行咁疏爽。拉上補下，仍無法抵銷內地客減少的衝擊。
零售商整合網絡，已唔單止影響街舖，一向被認為較穩健的商場都開始感到冷鋒。聞說過去幾年「惡晒」、商戶爭崩頭都入唔到的尖沙嘴某大場，由於今年有三至五成面積需要續租，故壓力頗大，有品牌最近「頂唔順」貴租、醞釀轉場，商場最後竟破天荒減租留客，完全出乎市場意料之外。區內另一細商場壓力就更大，因一些擁有多品牌的商戶想撤離，如一走，就N個舖一齊關。今時今日要再搵人填返咁多吉位，相當艱難，唔減租就有鬼。
這一轉零售洗牌潮，現在才剛剛開始。
海迪