本季首席華將之地位，篤定由梁家俊同何澤堯單打獨鬥，今晚開場之前，何澤堯以25比21，多梁家俊四win，形勢已佔上風。一開場堯仔即刻爆方廐「威百利」，整個下馬威畀俊仔嘆。跑到第四場五班一哩，佢贏埋大熱門徐廐「金瀛」起孖，進一步拋離梁家俊六場頭馬，幾可穩奪今季華將一哥寶座。
呢場賽果算正路，「金瀛」未贏過谷草，都被捧成WP大熱，跑落果然有料到，直路走甩冇馬追到佢，季內第二次贏馬，配堯仔三戰更加一勝兩位百分百上名。臨尾杜利萊騎「升力」姍姍來遲外欄一冚得第二，六歲馬第八次做二奶黑到暈，今場輸頸位之微，出道至今始終贏唔到馬。第三名是另一難贏馬「威仔皇」，第四名係落飛馬「美國先鋒」，落飛黨喺後駒身上輸咗一筆獨贏本金。