打電話約賓架A吃飯，佢竟然話可能要到六月先至有時間應約，左丁山嚇咗一跳，問佢點解咁忙，佢話五月初先要去上海，跟住去台灣，下半月要到泰國，去完trip又有大把嘢要跟進，故此好唔得閒。佢咁熟悉三地事務，問佢有乜新形勢，佢話中國大陸最注重搞好經濟，以增國際影響力，牽頭搞AIIB，唔可以衰俾美國睇及為日本冷笑，習近平既然大權在握，中央政治局常委只係佢嘅助理，無人可以挑戰佢，仲唔趁此機會大力推動經濟發展咩。但隱憂係GDP高速增長不再，未來五年要保7%唔容易，理由點解？佢叫左丁山睇吓練乙錚教授之文章。左丁山係睇過嘅，主要講理論，一個國家之增長火車頭由第一產業轉換至第二產業，因生產力急升，經濟增長亦快，但由第二產業轉入第三產業（即服務業），自然增長率一定下降，因為服務業主要係靠人力，生產方法及生產力可以十年不變（例如教育、理髮、餐飲），GDP增長率好難唔向下跌，香港就是一個例子。從實際嚟睇，中國服務業僱員已超過3億人，而且愈來愈多，中國推動GDP增長超過7%係逐漸不容易。
於是有「新奇方法」，就係量寬，催谷股市，官媒聯手唱好配合，今時今日中國如果股市表現不濟嘅話，習李體制可以拿甚麼優異施政效績出來威威呀？打貪腐只不過是毛澤東清算異己之21世紀版本啫。
講到台灣泰國，賓架A就話係政治問題，台灣馬英九積弱，國民黨內亂不止，對手民進黨咄咄逼人，蔡英文已宣佈競選總統，國民黨大員還是你睇我，我睇你，敗象已呈！民進黨明年上台嘅話，大陸必然不假予顏色，台商只能食自己，靠台灣本土市場呀？只係少不更事之青年學生嘅天真想法。泰國則因為軍政府大權獨攬，要解決他信家族，審訊英祿，製造了一股政治暗湧，影響投資者心理，泰國旅遊業更加驚有事發生。唉，泰國傳統係寬恕，往事不究，故此多年來可以維持政變頻繁，國泰民安嘅局面，如有人係要改變傳統，來一次趕狗入窮巷，有風駛盡𢃇，就係為國家增添煩惱，禍及人民嘞。賓架A話佢在台北聽到柯市長有個外號叫做柯P，令柯市長大為不悅。但有人解釋話柯市長本是professor，稱之為柯P，實無不妥，呢位市長經常口不擇言，叫佢做柯P，幾幽默吖！