商場的生存之道，其實好像一場show hand，即使你無trump card在手，只要懂得虛張聲勢，讓對方看不穿你的底牌，一樣可以贏得漂亮。要贏除了靠運，更多時候，其實是靠嚇。
嚇人，先由個樣談起。我不是指你要擁有八両金的面孔，因為這有可能嚇死人。我講的那種靠嚇，是眉宇間流露出的一種懾人氣勢，一股嚇窒對手的霸氣；換言之，要贏，個樣一定唔可以太善良。好簡單，你望吓身邊嘅老闆同高層，有邊個嘅樣係楚楚可憐成個《大時代》藍潔瑛咁？我敢肯定，一定無。最佳的賣相，是丁蟹和方展博的混合體，忠得來帶股邪氣，正氣得來其實好奸，永遠予人一種深不可測mysterious的感覺，讓對手無法洞悉你的底蘊。
再說，聲線。如果你把聲天生鵪鶉，說話陰聲細氣，sorry啦，上位有排輪唔到你。在博弈擂台上，先聲奪人好重要，聲如洪鐘的人一開口已經蓋過了你把雞仔聲，贏不到話語權，就等如永遠無say，就算你幾有point都一樣無運行。聲大不代表會贏，還要看你能否字字鏗鏘，present厲害到勾魂奪魄，讓人對眼唔捨得離開。
還要，是懂得整色整水，隨時殺出一招「估你唔到」。舉個例，行內有間公司，為了pitch贏一單job，奇招盡出，明明係幾個人嘅pitch，個老闆拖行馬，帶埋一百幾十人現身會場，仲要一齊着住黑色戰衣，唔知還以為係黑社會晒馬。正所謂輸人唔輸陣，單係個勢已經贏人九條街，好難唔sure win。
你或會問，人靠衣裝，論勢，唔係應該先講着衫？無錯，precision in dress對全世界99%的人來說好重要，因為世上只有一種人，穿甚麼也不會遭人白眼，就是那些登上全球富豪榜的人。他們即使腳踏人字拖、手挽背心膠袋去IFC開會，門口個receptionist依然會四萬咁口對他笑。要贏show hand，關鍵是要造勢，即使一副爛牌在手，也能山雞變鳳凰，無得輸。
文廸晞
mailto:[email protected]