恒隆地產（101）主席陳啟宗一向能說善道，只要開正佢嗰瓣，要佢講一、兩粒鐘應該都冇乜問題，有小股東亦真係鍾意聽佢講嘢，趁噚日恒隆舉行股東會，認真提問，陳啟宗當然又認真地答，搞到原先半粒鐘開完嘅股東會，差唔多一粒鐘先至完，仲要因為有公關大員喊停先至完咋。
噚日恒隆股東會上有幾名小股東問咗超過10條問題，主要關於公司發展策略、派息等，散會後，個別小股東仲要走去台前，繼續圍住陳啟宗問問題，積極性同記者有得揮。
咁都啱嘅，恒隆喺內地有好多商場、寫字樓，內地消費疲弱唔多唔少肯定受到影響，陳啟宗都好坦白咁講，內地打貪及反腐等，對消費有一定影響，市場不宜對內地消費市道過份樂觀，但消費市道或者經濟略回一下，都係好事嚟嘅。