【拾遺補漏】
逾100個蠟像全部任攬任影，依然保持完好無缺，全靠幕後一班「蠟像化妝師」拾遺補漏。大學修讀時裝設計的黃健成入行8年，每日開館前花3小時為蠟像檢查及補妝，有時更要洗頭，確保每個「名人」均處於最佳狀態。
「仲要幫佢哋洗頭」
黃健成表示，每個蠟像均以油彩上色，經過與參觀者一日的親密接觸後或會掉色，長期被燈光照射亦會令顏色變淡，需要每日仔細巡視，並按照度身時的資料記錄適當補妝，同時亦要留意衣服若有皺褶，須馬上熨平。蠟像的頭髮以真髮編織，「有陣時仲要幫佢哋洗頭」。
黃健成主要負責館內亞洲巨星的部份，某些蠟像需要特殊處理，「好似陳慧琳咁，有好幾套衫不定時會換，換之前會打畀佢（陳慧琳）問」。又如籃球巨星姚明，補妝時同樣與別不同，「佢太高啦，補妝要擔梯先得」。
■記者佘錦洪