昨日結算過後，明日就到五一勞動節假期，又有long weekend喇。四月復活節假期後即上演「小奇蹟日」，五月又點呢？五、六月係傳統淡月，所謂「五窮六絕」，但從期權盤路睇恒指，活躍Put部署在26800，而Call就向29000至30000推進，五月有機會見30000。我睇五月大市會好波動，波幅拍住四月，宜做好風險管理！
本周股市新話題係中式QE，但旋即被中央官員K.O.。中證監又以11句金句提醒股民炒股風險，包括要謹慎理性及小道消息不可信等，為股市降溫。《上海證券報》昨更用「落山風吹起」來警示市場風險，A股以平收作回應；港股則微跌。
新業務前景佳 盈利看俏
其實港股已升了一段時間，在高位輪流炒作下，點揀股呢？除了要睇盈利、派息、資產淨值、現金流等基本因素外，仲要未曾急升、估值未算太高、走勢唔算太差、成交唔會太少。我近日就留意到碧生源（926），雖然月初仲係8毫幾子，現價則為1元，但大致符合上述準則。
碧生源主要於內地從事開發及產銷保健品，主打的減肥茶和常潤茶擁有國家保健品批文（藍帽子標誌），市佔率分別為42.7%及21.7%，係減肥茶和通便茶龍頭。品牌舊年重整後，業績扭虧為盈兼恢復派息。董事長趙一弘話，經濟放緩無礙產品銷情，因消費者對健康更加關注。管理層預期，今年主要產品起碼加價15%。
該公司計劃在網上推出多款花茶和果茶，由於年前曾在微訊視頻營銷，已建立網售渠道，額外成本有限。該公司更裝設了可生產藥用功能茶的生產線，並已製成治理高血壓的降壓茶，正待藥檢局審批。此外，又正洽購著名治腫瘤醫院北京普祥，現處盡職審查階段。
碧生源上周公佈一單獎勵銷售要員的關連交易，間接披露取得專治癡肥的西藥奧利司他的十年獨家銷售權，進軍OTC減肥藥市場。此藥係唯一同時通過歐美和中國認證的非處方減肥藥，將走高檔路線，預期零售價為398元人民幣，今年可望有盈利貢獻。新業務有前景，推廣開支則減少，今年盈利有望大增；加上係淨現金公司，估計仍會慷慨派息。
估值方面，碧生源市盈率26倍，未到頂。每股資產淨值略低於1元，但在北京和上海物業並無估算增值，因此實際應略高於1元。1元亦係管理層購股權認購價，並打算以此價發行新股收購普祥，可於1元以下分注收集，上望1.4元，跌穿0.9元止蝕；此股街貨不多，隨時落鑊炒作。
割柑人
本欄逢周四刊登