有人連三個月試用期都未過就走人，但偏偏有班人同一份工返足幾十年，到退休都唔捨得走。中文大學早幾日就向105個員工頒長期服務獎，當中有9個仲做夠35年，認真巴閉。喺中大物業管理處做一級監工嘅葉光明做足35年，由整課室張凳到搭畢業禮大台樣樣關佢事。佢話雖然啲嘢好濕碎，但好多人日日搵佢哋求救，最難忘係當年尤德訪校，特登做咗個木斜台駁上路壆，用五噸貨車試過都冇事，點知港督架防彈車一碌就碎，嚇到佢個心離一離。下年退休嘅佢仲話，最唔捨得係班好同事。
擅長修復漆器同油畫嘅文物館設施及器材主任甯雄斌亦喺中大做咗25年，從戰國木漆器到漢代竹簡書都修復過，經手嘅展覽有80幾個，仲係香港第一個將MP3機用喺展覽導賞嘅人。同樣下年退休，佢就計劃推廣文物保育意識，保留珍貴遺產，「唔好到病先嚟搵醫生」。