已故天后梅艷芳（阿梅）嘅媽咪覃美金（梅媽），每個月可以喺阿梅遺產入面，攞5萬蚊做生活費，當中有2萬係用嚟交跑馬地住所嘅租金，不過梅媽因為冇交租俾人收樓，最近搬咗去北角住。跟住梅媽就向法庭申領18萬，話用嚟畀搬屋費同新屋嘅租金，噚日梅媽去到高等法院聽判決。
官斥法律喺頭上
判決結果係，破產管理署冇反對，仲會由新租約生效日，幫梅媽交36,000蚊租金，生活費就維持不變。但梅媽反問法官：「可唔可以每個月扣10萬蚊畀我？」法官拒絕，仲話：「呢個係法律，並唔係法官鍾意點做都得，法官只係執行法律，法律喺頭上，唔係喺凳下。」
梅媽好唔滿意裁決，離開法庭時仲發脾氣鬧：「3萬蚊生活費做得乜？食得乜？叫我唔好食呀？我𠵱家食豬餿，要去買平菜，買平嘢食。」跟住再繼續鬧：「佢哋食我唔使食？以前12萬自己交租，乜都唔使欠，唔使求人。」係咪阿梅遺產剩錢唔多？梅媽話：「樓賣完一間又一間，冇人簽紙都賣，最後一間賣到億幾，我一毫子都分唔到。」
案件編號：HCMP2981/2004
撰文：馮仁昭
