港人要求高絕對唔係新鮮事，有時啲投訴仲會過咗火位。話說尼泊爾大地震後，全球旅客都心急返屋企，有位港人前日順利返港後，喺機場對傳媒話要投訴港龍點解取消班機，令旅客要流落機場一日先返到屋企。唔少空姐空少聽到都嬲嬲豬，激氣兼大叫冤枉。
加德滿都機場大擠塞
八方問過港龍空勤人員協會主席莫海珊，佢為同事大平反，話港龍一班機都冇取消過，災後第二日，港龍派咗幾十人分兩班機去加德滿都接乘客，但係災區飛機升降唔係咁易，機場控制塔要讓路畀運送物資同救援人員嘅飛機優先起降，其他民航機要排隊。
當日其中一班機喺加德滿都上空盤旋3個鐘先有得降落；另一班機仲轉折，空姐空少要搭其他公司機到吉隆坡，之後轉飛孟加拉達卡，夜晚先到加德滿都。莫海珊話，飛加德滿都嘅編更，原本會安排留宿一晚再返港，但受災情影響，改做即日往返，同事要踩足16個鐘，冇托手踭之餘仲有人主動請纓。佢話大地震嗰陣，港龍都有十幾個同事喺加德滿都，因為酒店地震後有裂縫，全體撤到酒店外空地瞓通宵㖭呀。