政府推出之2017年行政長官普選辦法，口號係「2017一定要得」，以前曾蔭權搞政改，話明要「玩鋪勁嘅」，口號係「起錨」，結果就係多咗一個超級區議會直選（仍然係功能組別），對香港之民主選舉成份，並冇增加得幾多，隻民主號遊艇起錨後就隨海飄流，漫無目的，卒之由中央拉隻艇返碼頭，重新拋錨，唔俾隻艇遊來遊去，用一個831金剛罩將隻艇定住，唔准亂咁郁。
現在艇上又要搞選船長遊戲，請1200名乘客上船選船長，呢1200人點樣嚟嘅呢？絕大部份係遊艇大東家嘅老友、朋友，靠東主吃飯，以搵銀為最大目的，一定睇住大東家面色嘅聽話之士，大東家打個眼色，佢地就心領神會，知道如何配合嘅啦，如果上咗艇拉關係，俾面俾面啫，點會rock the boat呀？有一啲不知天高地厚，搞唔清楚環境嘅人士上咗艇，以為可以參加選船長遊戲，梗係會變成別人玩偶，俾人玩到殘，仲兼且成為大東家嘅國際宣傳工具㖭。
上唔上船？政府講「2017一定要得」，泛民人士必然一定唔得，不上船還可維持清譽，上咗船成為陪跑陪玩陪笑份子，甘心受人利用。香港如果可以好似倫敦咁開賭盤，（或者倫敦博彩公司真係會開盤都唔定），做莊訂下泛民主派議員上船之賠率，相信不少香港人會下注，乜唔係啫：四月二十二日立法會有異象，（一）黃毓民、梁繼昌唔出席，（二）梁國雄、湯家驊唔參加泛民議員集體離場，（三）離場議員中，莫乃光、郭榮鏗唔跟大隊。政府要撬四票就可以保送2017特首普選方案過關，上述六位泛民派之422表現，甚為令人矚目，必定成為政府游說對象，呢六位仁兄之轉軚賠率由幾十倍急降到十倍以下，至少有不少中環人係咁睇法。不過政制及內地事務局局長譚志源仲講過要保住怪醫梁家騮一票，且看呢位醫生似乎想棄權唔投票，順從醫學界功能組別嘅選民意見喎！既然係咁，大家鬥打民意牌啫，左派有聯繫嘅民意調查指出逾半數本港市民支持普選方案袋住先，但最有公信力之港大、中大、理大三間大學民意調查單位已開始做滾動式民意調查，目前未知結果如何，但愛國報紙誠恐有失，調查未開始就發重炮攻擊鍾庭耀，焦急之情溢於言表，呢鋪唔係玩泥沙㗎！