【中環】曾經講過唔好意思俾市民捕獲合照嘅55歲美魔女鍾楚紅，日前傍晚6點幾喺中環必列者士街俾記者捕獲了！戴住黑超嘅紅姑同埋一個女性友人喺餐廳度食飯傾偈，雖然紅姑當時側側地背住玻璃窗坐，但係難逃記者法眼，見到佢哋傾得好開心，紅姑仲周不時撥吓啲頭髮，真係隔住玻璃窗都俾佢電到暈得一陣陣。
冇拎走牛肉乾
紅姑泊咗架車喺餐廳對面馬路，可能同女友人傾得太投入，所以冇為意有警察喺出面抄牌，直到有餐廳職員通水，佢先拿拿臨走出餐廳跑過對面馬路，睇吓趕唔趕得切叫警察哥哥手下留情。冇戴黑超嘅紅姑一臉素顏，笑笑口同警察哥哥講咗一輪嘢，但係最後都失敗咗，事關警察哥哥已經落咗筆，搞到紅姑尷尬兼冇癮，跟住又見到自己俾記者影晒相，所以就好快咁轉身走返入餐廳。
過咗10分鐘左右，個樣有啲無奈嘅紅姑過馬路攞車走人，可能佢有啲唔係幾開心，所以連「牛肉乾」都冇攞走，九秒九開車走人，不過佢都有同記者揮手拜拜，之後再喺路口接埋女友人先離開。
採訪、攝影：潘冠恩、朱志聰、畢紹基
