無綫啲新劇越來越冇話題性，收視同樣越來越唔好，好似大咗結局嘅《水髮胭脂》，由頭到尾都好似冇咩人講，反而重播《大時代》個勢分分鐘仲勁過台慶劇。
至於鍾嘉欣同汪明荃及松哥孭飛嘅新劇《華麗轉身》，最近大台就力谷播廣告，由於呢套劇主題曲由阿姐唱出，所以開住TVB睇嘅話，就會成日俾阿姐首歌「經過那些年~~跟你重回那天暑假~~」洗腦，由於阿姐係有「特別嘅唱歌技巧」，所以一班網民覺得首歌超洗腦之外，仲覺得好煩。
其實高登仔一向對阿姐「特別嘅唱歌技巧」冇咩好感，所以逢有阿姐唱歌嘅節目播出，都會有高登仔開Po呼籲佢唔好再唱，好似2010年《荃加福祿壽》時亦一樣，今次就有高登仔話阿姐唱歌好似「國王的新衣」咁，身邊冇人講真話喎。其實阿姐都只係唱出個人風格，有好多fans支持佢。