青年事務委員會主席劉鳴煒MW噚日首次以主席身份同青年交流，雖然現身嘅青年100人都冇，但舉手問問題嘅就有大概廿位，反應算幾踴躍，身為會員嘅香港青年聯會主席霍啟剛都有捧場。
MW早前講到幾鍾意睇《100毛》，噚晚就有少女問佢會唔會幫委員會整番本。
MW先幫公民教育委員會推銷佢哋本刊物《kidults》，然後連消帶打話好似《100毛》呢啲成功嘅創意刊物，都唔倚賴政府資源，所以創意刊物唔需要政府做。
跟住有人問MW點睇港獨，佢冇好似特首梁振英咁一味喪鬧，只稱無論市民定領導，都要面對香港人嘅身份同文化確係同內地唔一樣嘅問題；有人話搞港獨只係一種極端嘅表達，佢就覺得港獨唔啱嘅同時，一樣唔認同好似有啲人所講，要將香港內地化。