電影《打擂台》導演郭子健自認是死硬韋家輝迷，特別《大時代》對他影響至深，家中還珍藏一套當時錄下的影帶，他說：「因為當年媽咪要睇對台套《勝者為王II天下無敵》，所以我要錄起《大》片睇，當年播嘅時候17歲左右，感覺都未係咁大，到出咗嚟做嘢翻睇，個感覺好似觸電咁。」早在今次重播之前，他已經就《大》片在電台節目講足一個月作解構。
郭子健透露《大》片曾經在兩段時期對自己人生中起了影響性作用，他說：「記得嗰時22歲仔左右，打緊份工做graphic designer（平面設計員）。有日翻睇套劇講到羅樂林做嘅葉天同青雲講『如果聽日你就死，有邊份工係你願意將最後嘅時間放喺度……』個一刻真係呆咗，呢句話深深打動咗我，好似當頭棒喝，咁啱導演會開咗個編劇課程，過兩日辭咗份工報名，因為我嘅夢就係做導演。」
杯麵論領略人生道理
學成入行的郭子健由低做起，更試過有兩年差不多沒工開，無所事事又翻看《大》片，他說：「睇到有一集講林保怡要破江毅嘅連環船，劉青雲用咗六個杯麵教保怡話『我喺其中一個杯麵放咗一蚊，如果你每碗試幾啖，你未搵到嗰一蚊已經飽死，但只要你食到底你就會搵到嗰一蚊，每一杯都有一蚊』，真係勁，教曉我一做就要做到盡，支持我最後冇放棄。」
郭子健師承已故的編劇司徒錦源，但韋家輝的作品對他編、導的手法上影響深遠，他說：「當時我師傅畀咗好多韋家輝劇本我用嚟學寫劇本，當時可以用茅塞頓開嚟形容，嗰時係背佢嘅劇本咁去學寫結構。佢對人物嘅描寫同衝突係環環相扣，而佢嘅人物通常都包含最愛同最恨、最孔武有力同膽小、對你最好嘅亦係最壞嘅人，呢種矛盾已經成為韋家輝嘅金科玉律，亦係我學到點樣處理人物間嘅關係同性格。」郭子健的舊作《打擂台》及新作《全力扣殺》中經常提到明知輸都要做的精神，其實在韋家輝的作品經常提到。
除郭子健外不少新世代編劇都受到韋家輝的啟發，《赤道》其中一位導演梁樂民認為《大》劇在創作思維及人物構造上有啟發作用，他說：「套劇本身嘅結構、人物性格等等，都可以話係text book教材，原來可以寫得咁盡。韋家輝當年做呢部劇29歲，我已經問番自己，29歲我做緊乜嘢。佢真係一個高手，入面嘅演員組合、編、導，甚至主題曲都一流。」而《重口味》導演黃智亨是重播時看到此片，他說：「套劇其實一啲都唔似電視劇，結構係一套電影。」《前度》導演麥曦茵以神劇來形容：「咁多年嘅劇都可以唔過時，體會到劇集嘅張力。𠵱家啲人成日睇韓劇、日劇，原來香港咁多年前已經有咁犀利嘅劇。」
採訪：何永寧