體育界名人洪祖杭養馬多年，最威水係已退役累積獎金過千萬嘅「火龍駒」，隻馬響2011年，曾經勝出一級賽遮打盃。之後洪祖杭雖然再冇贏過大賽，但今季佢嘅運氣相當好，不斷享受勝利樂趣之餘，更喺馬場盡享家庭樂。
點解咁講呢？原來唔經唔覺，洪祖杭今季已經贏咗四場頭馬，佢同囡囡洪羽緁合夥嘅「馬飛龍」，本月15日打開勝門，兩父女一齊拉馬；四日後另一愛駒「飛龍駒」取得季內第三捷，贏馬收獎金係其次，最開心係極少喺馬場出現嘅洪祖杭公子洪定騰，嗰日陪爸爸觀戰，一齊揚威凱旋門，咁至係人生樂事。
好嘞，今期（29日）賽事輪到洪定騰自己嘅「龍騰虎震」上陣，隻馬過去兩次勝出，呢位年輕靚仔男神馬主都冇出現，但經過日前「飛龍駒」拉頭馬後，洪定騰隨時拉出癮，再同老竇入場都未定。
睇番「龍騰虎震」，上場30倍大冷殺入一席季軍，明顯有回勇迹象，隻馬拼後操得好辣，曾經彈草閘催谷狀態，今次用實有鬥志嘅騎師連達文，睇嚟洪氏一族又會有頭馬進賬。