天氣開始熱，有啲人會開始鋪涼蓆（圖），但收埋咁多個月，唔清潔就用好唔衞生，尤其可能佈滿塵蟎。不過涼蓆唔適合用水洗，可以點做？原來兩個工具就可以搞掂。
網上教只要用一條濕毛巾，鋪喺涼蓆，然後用熨斗熨條毛巾，來來回回咁熨成塊涼蓆，大約熨10分鐘。如果想熨得方便啲，可以用毛巾包住熨斗嚟熨，但淨係整濕熨斗面部份嘅毛巾，以免水份接觸到電線。
醫生：洗最有用
理論係塵蟎喺17至30℃最活躍，但只要去到55℃，持續10分鐘，塵蟎就會死。此外，熨完之後要徹底清潔條毛巾，因為會有好多塵蟎屍骸㗎。
醫學會傳染病顧問委員會主席梁子超話，高溫可以殺死塵蟎，減少活嘅塵蟎對於敏感嘅人，有一定幫助。不過塵蟎屍體一樣可以致敏，所以始終都係直接沖洗最有用，「但如果有啲物品唔可以洗嘅，咁樣做（高溫殺死）都好嘅」。佢話如果真係因為咁而有哮喘、鼻敏感，就梗係要睇醫生啦。
費清
＃要生計，也要生活
＃毋忘初衷