最近網上流傳一張港鐵路線圖，同平時睇開嘅有分別，站名變晒屋苑名，仲有各屋苑呎價。原來呢幅疑幻似真嘅《港鐵沿線物業呎價圖》並非港鐵出品，而係中大社會及公民參與組主任梁啟智博士有份製作，梁啟智話受到紐約曼哈頓租金地圖啟發製圖，藉此引起公眾關注樓價問題，八方睇完只有一個感受：普選難、上車更難，被迫響應蘇錦樑局長呼籲，等多下一班車囉！或者睇吓離港鐵站遠少少嘅樓盤，可能有多啲選擇啩。
僅12個站低於一萬
梁啟智噚日接受《壹錘定音》訪問時話，佢以每個車站各出入口約200米範圍內、過去半年交易量最多嘅屋苑為代表；呎價則按實用面積計算，以4月25日中原數據公佈為準。若中原冇單獨數據，就以該屋苑最近五次成交嘅平均數為準。
結果令人嚇一跳，因為咁多個站中只有12個站嘅屋苑呎價低於一萬，呎價最平嘅係油塘站嘅油塘中心（8,732）、康城站嘅日出康城（8,893）同鰂魚涌站嘅中興大廈（8,957）。 呎價最高嘅則為中環站嘅榮華大廈（31,864）、西營盤站嘅縉城峰（21,645）同九龍站嘅擎天半島（20,789）。
梁啟智最意外嘅係日出康城原來樓價算「好平」；以前住西環嘅佢亦對西環樓價飆升感慨萬千。佢承認圖中未有討論到影響樓價嘅因素，如噪音、人口擠迫同環境污染等問題。佢慨嘆早前樓價問題有唔少關注，但近日明顯減少，希望呢幅圖再次喚醒公眾討論。
李八方
mailto:[email protected]