係籃球漫畫迷一定睇過《男兒當入樽》，安西教練名言：「要是放棄的話，比賽就結束了喔！」真係好勵志。周一NBA季後賽首圈，多支徘徊出局邊緣嘅球隊都大反撲──公鹿作客94:88擊敗公牛，由落後0:3劣勢追成2:3；而東岸老八網隊面對鷹隊，原本一致被睇淡，但佢哋喺主場戰至加時贏120:115追成2:2。
MCW扭傷繼續搏殺
NBA從來冇球隊喺七場四勝賽制中，場數落後0:3下可反先晉級，不過以卡達威廉士（Michael Carter-Williams、MCW）、米度頓（Khris Middleton）同G安迪度安寶（Giannis Antetokounmpo）等「90後」為主力嘅公鹿就唔信命運，希望創造歷史。佢哋上仗已經靠貝歷斯（Jerryd Bayless）絕殺破蛋，周一作客公牛主場聯合中心，眾將信心十足；MCW雖然第三節一度扭傷足踝，不過貴為上季最佳新秀，呢位23歲仔夠晒當打，返更衣室治理一陣繼續再打過。
全場大部份時間落後嘅公牛，第四節一度追近至三分，不過最後階段投射失靈，包括戴歷路斯（Derrick Rose）上籃俾G安迪度安寶硬生生封阻；公鹿最終以六分險勝，場數追至2:3。MCW全場貢獻22分、9助攻同8籃板，教練傑特（Jason Kidd）賽後就話：「雖然好多人都讚己隊前途無限，但我哋要把握現在。」
至於網隊面對鷹隊輸晒頭兩場，不過返到主場好爭氣，周一靠迪朗威廉士（Deron Williams）個人獨取35分，鬥到加時險勝五分，幫球隊追成2:2平手。而拓荒者亦都避免提早出局，主場99:92擊敗灰熊，場數追至1:3。
