梁振英噚日喺政總搞場祝酒會，慶祝香港發明家喺日內瓦國際發明展攞獎。CY致辭時強調社會要支持成立創科局，但話口未完就有得獎者演講篤爆政府冷待科研成果。水中銀（國際）生物科技有限公司攞咗至高榮譽大獎，董事總經理杜偉樑慨嘆攞獎技術可以測試各類食品安全問題，兩年前向食安中心介紹，結果石沉大海。
佢話公司發明轉基因鯖鱂魚同斑馬魚胚胎毒理測試技術，可以喺兩日內測試出千種有害物。呢兩年公司寄咗超過10封信、數百個樣本化驗結果畀食安中心解釋技術，但中心話不合法規。佢話近兩年塑化劑掀起食安風暴，如果政府肯採用技術，就可以提早發現有毒食品啦。