「你再唔娶我就分手」阿怡含住泡眼淚，拎分手去要脅我……again。「我唔係唔想娶，但而家我哋真係唔夠錢買樓呀。你話租樓，得，但租完仲邊有錢儲？」儲咗幾年，銀行積蓄就算結婚都係掹掹緊，買樓？更加係沒可能！
「我又冇話一定要買樓租樓，最多結完咪分開住返自己屋企先，反正你同我屋企都咁近公司，車錢都慳番！」
結婚但分開住，呢個咁破天荒、有違普世價值嘅新概念都俾阿怡諗到，證明畸形樓市果然恐怖過幅射，影響到方圓百里嘅人思想行為變異。
女人邏輯 與老散一致
「結婚但分開住？同叫碟乾炒牛河走牛有咩分別？」「你……你形式主義！」聽到呢度，我諗大家都會同我一樣，想反駁阿怡：「結婚咪又係形式主義。」
但見到佢泡眼淚就嚟跌落嚟，我作為男人，都有淆底的時候，我只係表現出一幅無奈嘅表情，更大鑊係，我唔小心「jip」咗一聲。阿恰對眼碌到好大，好明顯堅嬲！
「你jip我？你唔愛我啦！」呢個咁嚴重指控，小人真係擔當唔起，我即刻拖番實佢隻手，「緊係唔係啦，你諗錯隔籬啦。」「你咁緊張否認，仲唔係有嘢？」
呢一刻我先知，女人嘅邏輯，就好似啲「神X」散戶，阿爺明明澄清冇大規模重組，所有神船、神油、神機都未落實，但班老散總係先入為主，覺得你越否認呀嘛，即係越有嘢！照炒！
所以話呢，今時今日真相已經係唔值錢，疑幻似真嘅先係寶。就好似聯儲局咁，得閒出吓口術，一時又話減息，一時又話未減住，煩過女人，難得你班人又炒得過癮。
咁我明啦，如果真係有神，唔怪得佢從來都唔肯顯靈，畀下期六合彩開嘅冧巴我，因為佢太了解你班人類，唔現身就聲聲阿門阿門，一現身就神棍神棍。
「你乖啦，唔好因為憑空想像出來嘅事，嬲到揈開我隻手！」要明女人嘅邏輯，真係比炒股更難，而且仲好竧，於是我決定……投降，「好啦好啦，我哋試吓食乾炒牛河走牛啦。」
當然，喺「神X事件」上，個個都以為阿爺係醉酒佬，明明身有屎醉咗但死口唔認，但有幾多人知道，其實真正飲醉嘅，明顯唔係阿爺，係佢哋自己。
阿怡的朋友聚會：
「阿怡，你結婚呀？恭喜你呀！咁你結婚之後住邊？」
「各自返屋企住呀，冇計啦，要儲錢。我敢講，好似我咁搞結婚，係全世界最慳。」
「點慳呀？」
「首先我旅行結婚唔擺酒，之後又唔使租樓，儲多好多錢。」
「咁點解唔儲咗先結婚？咪一樣？」
「唔得，儲完先結的話，我嘅分手風險成本咪好高！」
千頌C
http://fb.com/winbigwok
本欄隔周三刊登