「賭后」何超瓊旗下信德（242）舊年物業收益豐收，刺激公司盈利大增兩倍，何超瓊嘅人工自然亦有得加，佢舊年袋走1,300萬元，加薪20%，相對公司盈利增幅當然唔算多喇。至於佢爸爸，即係賭王何鴻燊，就繼續袋5萬大元，應該只係意思意思㗎啫。
何超瓊近年真係百足咁多爪，除咗澳門賭業，又有參與航空事業，信德都有份投資捷星香港，持有三分一股權，可惜捷星香港暫時仍然未取得營運牌照，未知幾時可以飛。
不過此事絕對冇影響何超瓊投資其他新行業，早排佢就決定跟已故遠東發展創辦人、亞視前老闆邱德根之子邱達昌，仲有廣州富力（2777）創辦人李思廉等人合作進軍電視行業，向通訊局申請本地免費電視廣播及綜合傳送者牌照。又係要有牌先做得，即管睇佢呢次得唔得嘞。