本港唔少上市公司嘅主席本身就係大股東，尤其係家族企業，港交所（388）、港鐵（066）呢類有政府色彩嘅上市公司就屬於例外，主席由政府委任；一般上市公司主席真係好少話一股股份都冇，康宏金融（1019）主席王利民最近竟然沽清康宏嘅股票，套現接近3,000萬元。
康宏𠵱家嘅主要股東係康健集團（3886），持股超過兩成，王利民喺康宏嘅持股量本身都唔多，只得5.54%，上星期四以平均價0.857元沽清，似乎想齋做受薪主席。翻查康宏最新年報，王利民舊年總年薪486萬元，加薪50%，主要因為花紅大幅增加。
不過又咁講，王利民一向出位，佢鍾意跑馬拉松，跑去撒哈拉沙漠、北極與南極就夠晒特別，佢𠵱家忽然沽晒貨，話唔定跟公司供股有關，康宏𠵱家搞緊一供三集資吖嘛。