「老虎仔」邱達昌早前自爆牽頭同賭后何超瓊、富力地產（2777）大股東李思廉同聯想控股嘅投資基金弘毅投資組財團申請免費電視牌照，當大家焦點放喺「老虎仔」身上，其實佢細佬、遠東控股（036）主要股東邱達根（Duncan）同樣活躍。
買毅信兩日升82%
佢最新動作係喺上星期五買入上市年半左右嘅毅信（1246）9.83%，每股1.2元計，總作價5,880萬元左右，但以毅信噚日收2.19元計，Duncan兩日就勁賺82.5%，真係搵大錢嘅大時代。
有趣嘅係，今年初周街搵殼股炒，有唔少「高手」都推介遠東控股同毅信，話兩隻都好有賣殼條件，結果Duncan一方不斷減持遠東控股（家陣好似得番20%左右），毅信大股東黃世忠亦將手持逾51%股權全數抵押借錢，到近日索性配股減持，咁啱接貨就係Duncan。
一來一回，Duncan賺多定賺少華華就唔識計，但可以肯定嘅係，朱李月華嘅金利豐（1031）一定係贏家，何解？皆因幫遠東控股配股、借錢畀黃世忠同幫黃世忠配股嘅都係金利豐。